في كل حي ولد عترة وصبية حنان
وكلنا جيرة وعشرة وأهل وخلان
أميرة عاقلة في الحجلة العقل يطير..
كانت صغيرة بضفيرة كان هو صغير
ساعة ما تضحك مع أخوها تلاقيه بيغير
ولما ترفع قلتهم تلاقيه عطشان
زمانه ماشي بخطوة يضم
زمانها كبرت وبقت أم
زمان جواب جايلها بيجري على العنوان
الفجر بيلاقي المغرب وبيجي ويروح
والليل يطل على الشارع شباك مفتوح
هنا الرصيف وهنا السلم وهناك يا سطوح
متعلقة كمام النونو بديل الفستان
زمانه ماشي بخطوة يضم
زمانها كبرت وبقت أم
زمان ضناهم في المدرسة كنز الأوطان
نحضن ولادنا ولا نخلى حنيه وذوق
نكبر معاهم ونغنى لقدام ولفوق
يادى العيون اللي بتقرا فى كتاب الشوق
الدنيا خضرا ومش فاضل على بكره زمان
زمانه ماشى بخطوه يضم
زمانها كبرت وبقت أم
زمان جواب جايلها بيجرى على العنوان
فى كل حى ولد عتره وصبيّه حنان
وكلنا جيره وعشره وأهل وخلان
أصل الحكاية حكايتنا ابن الانسان
فــــــــــؤاد حداد
